ఆదిలాబాద్‌లో కవిత పాంచజన్య సంకల్ప సభ.. కాంగ్రెస్, బీఆర్ఎస్, బీజేపీలపై తీవ్ర విమర్శలు

ఆదిలాబాద్‌లో కవిత పాంచజన్య సంకల్ప సభ.. కాంగ్రెస్, బీఆర్ఎస్, బీజేపీలపై తీవ్ర విమర్శలు

రైతులకు నీళ్లు ఇవ్వని బీఆర్ఎస్‌కు రైతు గర్జన సభ నిర్వహించే హక్కు లేదు – తెలంగాణ రక్షణ సేన చీఫ్ కల్వకుంట్ల కవిత

చనఖా–కొరటా ప్రాజెక్టు అంచనా వ్యయం రూ.368 కోట్ల నుంచి రూ.2,100 కోట్లకు ఎలా పెరిగింది? అవినీతి సొమ్ము ఎక్కడికి వెళ్లిందో సమాధానం చెప్పాలి

రెండు ఎమ్మెల్సీ స్థానాలకు బీసీ అభ్యర్థులను ప్రకటించాం.. సామాజిక న్యాయాన్ని చేతల్లో చూపిస్తున్నాం

ఆదిలాబాద్, అక్టోబర్ 30:

ఆదిలాబాద్ జిల్లా అభివృద్ధిని గత పాలకులు, ప్రస్తుత ప్రభుత్వం నిర్లక్ష్యం చేశాయని తెలంగాణ రక్షణ సేన చీఫ్ కల్వకుంట్ల కవిత విమర్శించారు. ఇంద్రవెల్లి పుణ్యభూమి నుంచి ప్రజల ఆశీర్వాదం కోరుతూ రాజకీయ పోరాటానికి శ్రీకారం చుడుతున్నామని ప్రకటించారు. ఆదిలాబాద్‌లో నిర్వహించిన పాంచజన్య సంకల్ప సభలో ఆమె కాంగ్రెస్, బీఆర్ఎస్, బీజేపీ పార్టీలపై తీవ్రస్థాయిలో విమర్శలు గుప్పించారు.

రైతులకు నీళ్లు ఇవ్వని బీఆర్ఎస్ ఏ మొహం పెట్టుకుని వస్తుంది?

ఆదిలాబాద్ జిల్లాలో లక్షల ఎకరాలకు సాగునీరు అందించాల్సి ఉండగా, గత పదేళ్లలో బీఆర్ఎస్ ప్రభుత్వం ఒక్క ఎకరాకు కూడా తగిన న్యాయం చేయలేదని కవిత ఆరోపించారు. తుమ్మిడిహెట్టి ప్రాజెక్టును పూర్తి చేసి ఉంటే రెండున్నర లక్షల ఎకరాలకు సాగునీరు అందేదని అన్నారు. కాగజ్‌నగర్ ప్రాంతంలో 1.05 లక్షల ఎకరాలకు నీళ్లు రావాల్సి ఉండగా కేవలం 6 వేల ఎకరాలకే అందించారని విమర్శించారు.

కేపీ రావు, జగన్నాథ ప్రాజెక్టులు ఏళ్ల తరబడి పెండింగ్‌లో ఉన్నాయని, గోదావరి, ప్రాణహిత నదులు ఉన్నప్పటికీ రైతులకు సాగునీరు అందించడంలో పాలకులు విఫలమయ్యారని మండిపడ్డారు. రైతులకు నీళ్లు ఇవ్వని బీఆర్ఎస్ ఇప్పుడు రైతు గర్జన సభ పేరుతో ఆదిలాబాద్‌కు ఏ మొహం పెట్టుకుని వస్తుందని ప్రశ్నించారు.

చనఖా–కొరటా ప్రాజెక్టులో భారీ అవినీతి జరిగిందని ఆరోపణ

చనఖా–కొరటా ప్రాజెక్టు నిర్మాణ వ్యయం రూ.368 కోట్ల నుంచి రూ.2,100 కోట్లకు పెంచడంపై కవిత తీవ్ర అనుమానాలు వ్యక్తం చేశారు. ప్రాజెక్టు వ్యయం ఇంత భారీగా ఎందుకు పెరిగిందో ప్రజలకు వివరించాలని డిమాండ్ చేశారు. ఈ వ్యవహారంలో అవినీతి జరిగిందని ఆరోపిస్తూ, ఆ సొమ్ము ఎక్కడికి వెళ్లిందో మాజీ మంత్రులు సమాధానం చెప్పాలని సవాల్ విసిరారు.

రైతులను పంటలు వేయవద్దన్న ముఖ్యమంత్రి పదవిలో ఉండొద్దు

రైతులను పంటలు వేయవద్దని సూచించిన ముఖ్యమంత్రి రేవంత్ రెడ్డిపై కవిత తీవ్ర విమర్శలు చేశారు. వ్యవసాయంపైనే ఆధారపడి జీవించే రైతులకు ప్రత్యామ్నాయం చూపకుండా పంటలు వేయవద్దని చెప్పడం అన్యాయమన్నారు. రైతులకు నీళ్లు, కరెంట్, యూరియా అందించడంలో కాంగ్రెస్ ప్రభుత్వం విఫలమైందని ఆరోపించారు. ముఖ్యమంత్రి ఇచ్చిన హామీలను నిలబెట్టుకోవాలని డిమాండ్ చేశారు.

ఇంద్రవెల్లి అమరవీరులకు ఇచ్చిన హామీ ఏమైంది?

ఇంద్రవెల్లి పోరాట యోధులకు నివాళులర్పించిన కవిత, రామ్‌జీ గోండు, వన్నెల ఎల్లన్న, వెడమ రాము, కొమురం భీమ్ తదితరుల త్యాగాలను గుర్తుచేసుకున్నారు. జల్, జమీన్, జంగల్ నినాదంతో ఆదివాసీలు సాగించిన పోరాటాన్ని కొనియాడారు.

ఇంద్రవెల్లి అమరవీరుల కుటుంబాలకు రూ.25 లక్షలు ఇస్తామని ప్రకటించిన ముఖ్యమంత్రి రేవంత్ రెడ్డి, అధికారంలోకి వచ్చిన తర్వాత కేవలం రూ.5 లక్షలు మాత్రమే ఇచ్చారని ఆరోపించారు. ఆదివాసీల హక్కులు, సంక్షేమం విషయంలో ప్రభుత్వం నిర్లక్ష్యం చేస్తోందని విమర్శించారు.

750 గ్రామాలకు కనీసం పాఠశాలలు లేవు

ఆదిలాబాద్ జిల్లాలో అపారమైన సహజ వనరులు ఉన్నప్పటికీ అభివృద్ధి మాత్రం ఆశించిన స్థాయిలో లేదని కవిత అన్నారు. జిల్లాలో ఇప్పటికీ పేదరికం కొనసాగుతోందని, సుమారు 750 గ్రామాలకు కనీసం పాఠశాలలు కూడా లేవని ఆవేదన వ్యక్తం చేశారు.

రంగారెడ్డి జిల్లాలో తలసరి ఆదాయం రూ.11 లక్షలు ఉంటే ఉమ్మడి ఆదిలాబాద్ జిల్లాలో రూ.2 లక్షలు కూడా లేదని పేర్కొన్నారు. ఒకప్పుడు రాష్ట్రానికి అధిక ఆదాయం అందించిన ఆదిలాబాద్ ప్రస్తుతం అభివృద్ధి సూచీల్లో వెనుకబడిందని అన్నారు.

యువతకు రూ.2 లక్షల నుంచి రూ.20 కోట్ల వరకు రుణాలు

తమ పార్టీ అధికారంలోకి వస్తే పాంచజన్య సంకల్పంలో భాగంగా ఐదు కీలక అంశాలకు ప్రాధాన్యత ఇస్తామని కవిత ప్రకటించారు. ప్రైవేట్ రంగంలోనూ మెరుగైన ఉచిత విద్య, వైద్యం అందించే బాధ్యత తీసుకుంటామని హామీ ఇచ్చారు. యువత తమ ఆలోచనలకు అనుగుణంగా వ్యాపారాలు ప్రారంభించుకునేందుకు రూ.2 లక్షల నుంచి రూ.20 కోట్ల వరకు రుణ సదుపాయం కల్పిస్తామని తెలిపారు.

రైతులు గౌరవంగా జీవించేలా చర్యలు తీసుకుంటామని, ఆదివాసీల సంక్షేమానికి ప్రాధాన్యత ఇస్తామని చెప్పారు. ఐటీడీఏ పరిధిలో జీవో 57తో పాటు గతంలో అమలైన 27 జీవోలను తిరిగి అమలు చేయాలని డిమాండ్ చేశారు.

యూనివర్సిటీ, పరిశ్రమలు ఎందుకు ఏర్పాటు చేయలేదు?

బీఆర్ఎస్ పాలనలో ఆదిలాబాద్ జిల్లాకు యూనివర్సిటీ, ఇంజనీరింగ్ కళాశాలలు ఏర్పాటు చేయలేదని కవిత విమర్శించారు. సిర్పూర్ కాగజ్‌నగర్ పేపర్ మిల్లు కార్మికులకు న్యాయం చేయకుండా ప్రైవేట్ వ్యక్తులకు వేల కోట్ల రూపాయలు ఇచ్చారని ఆరోపించారు.

సిమెంట్ కార్పొరేషన్ ఆఫ్ ఇండియా (సీసీఐ), నిజామాబాద్ షుగర్ ఫ్యాక్టరీలను ఎందుకు పునరుద్ధరించలేదని ప్రశ్నించారు. జిల్లాలో భారీగా పత్తి సాగవుతున్నప్పటికీ టెక్స్‌టైల్ పార్క్ ఏర్పాటు చేయడంలో గత ప్రభుత్వం విఫలమైందని అన్నారు.

సామాజిక న్యాయాన్ని చేతల్లో చూపిస్తున్నాం

సామాజిక న్యాయం గురించి కేవలం ప్రసంగాలు చేయడం కాకుండా ఆచరణలో చూపిస్తున్నామని కవిత అన్నారు. రెండు ఎమ్మెల్సీ స్థానాలకు బీసీ అభ్యర్థులుగా శ్రీకాంత్ గౌడ్, ఆకాశ్‌లను ప్రకటించామని వెల్లడించారు. రాజకీయ నేపథ్యం, ఆర్థిక బలం లేకపోయినా తెలంగాణ కోసం పనిచేసిన విద్యావంతులైన యువకులకు అవకాశం కల్పిస్తున్నామని చెప్పారు.

ఇలాంటి మార్పులే రాష్ట్ర రాజకీయాలను మార్చగలవని అభిప్రాయపడ్డారు.

అన్ని పార్టీలకు ప్రత్యామ్నాయంగా తెలంగాణ రక్షణ సేన

కాంగ్రెస్, బీఆర్ఎస్, బీజేపీ పార్టీలు ప్రజలను మోసం చేశాయని కవిత ఆరోపించారు. మతాల మధ్య గొడవలు సృష్టించి రాజకీయ లబ్ధి పొందాలని బీజేపీ ప్రయత్నిస్తోందని విమర్శించారు. తెలంగాణలో హిందూ, ముస్లింలు కలిసిమెలిసి ప్రశాంతంగా జీవించాలన్నదే తమ అభిప్రాయమని తెలిపారు.

ఆదివాసీలు, రైతులు, యువత, పేద ప్రజల సమస్యలపై పోరాడేందుకు తెలంగాణ రక్షణ సేన రాజకీయ శక్తిగా ముందుకు వచ్చిందని చెప్పారు. ఆదిలాబాద్ జిల్లా ప్రజల ఆశీర్వాదంతో రాబోయే ఎన్నికల్లో తమ పార్టీ అభ్యర్థులను అన్ని స్థానాల్లో గెలిపించాలని కవిత కోరారు.